PiacenzAntica

“eravamo ragazzi-poesia di Carlo Cerri 1970”

T'ho vista veccia 'd culp mama.
Et te c'a t'e cambià?
Enn'ia i me occ? Che dumanda!
Te t'era sèimpar qulla, seimpar uguàla;
t'av sèimpar vist acsè
dal de c'at m'àv miss al mond.
Un mond còntr'al me sangul
un mond ad vita grama.
E quand Lùig a l'àva 'lsà un pò al gùmat
c'a 'l gnìva a cà con la favella longa
t'andàva a sarà sò il finestar ad cursa
sinnò quàic d'òin pudìva andà a ripèt,
a quill 'c cardìva 'dvigh stuppà la bucca
il parol ad la cuscìnsa di povr'om.
Che ann, i ann dal trèinta!
Tudivma in gir 'cla tàla
c'a "mangiava pulèinta e marlùss
par purtà i sòd a la Banca Ragùss"
Ma nòi s'èrma ragass c'a 'n capìv gnint
g'àvma 'lmà fam.
"Mangì dal pan,ragass" te t'm'arcmandàva,
"mangì dal pan"
E pò la guerra.
E trà una guerra e l'àtra : misèria!
'Cm'èt fatt a fàgla dì a tiràm sò,
te, timida e 'mnùda
g'ho 'ncura da capil.
E pinsà c'a'l Gion l'era un mùradùr
Straurdinàri, ma allura..
E i stamattèina coi me occ nòv
t'ho guardà in fassia par la prima vòta
e quand t'ho vista veccia
't sum curs a brassà sò
parchè t'era 'stà bona d'alvàm
dop avim miss al mond.
Sèinsa gnint,
sèinsa dì gnint
sèinsa pudì dì gnit
par distùrbà 'nzòin,
ne i visèin, ne la gint, ne nòi.
"Gh'èra una vòta un om
con un ssciopp in spalla.."
Còitaml'ancura mama
la me fola..
Ciàpam par man,
cumpagnam ancura a scola..
Ma 'dess t'e 'dvintà veccia
in un ditt e fatt
sutta i me occ
ch'i 's n'eran mia datt.

Ti ho visto invecchiata mamma. Sei tù che sei cambiata? Sono i miei occhi? Che domanda! Tu sei sempre quella, sempre uguale, ti avevo sempre visto così dal giorno che mi avevi messo al mondo, un mondo contro al mio sangue, un mondo di vita grama. E quando Luigi aveva alzato il gomito e veniva a casa con la voglia di parlare tu correvi a chiudere le finestre altrimenti qualcuno poteva andare a dire, a quelli che credevano di averlo fatto tacere, le parole della coscienza di un pover'uomo. Che anni gli anni trenta! Prendevamo in giro la tale che mangiava polenta e merluzzi per portare i soldi alla banca Raguzzi. Ma eravamo ragazzi e non capivamo avevamo solo la fame. Mangiate del pane,ragazzi, tu mi raccomandavi, mangiate del pane. E poi la guerra. E tra una guerra e l'altra : la miseria! Come sei riuscita a crescermi, tu, timida e minuta devo ancora capirlo. Pensare che Luigione era un muratore straordinario, ma allora.. E stamattima con i miei occhi nuovi ti ho guardato in faccia per la prima volta e quando ti ho visto vecchia, sono corso ad abbracciarti perchè eri stata capace di allevarmi dopo avermi messo al mondo. Senza niente, senza dire niente, senza potere dire niente per non disturbare nessuno, ne i vicini, ne la gente, ne noi. "C'èra una volta un uomo con un fucile in spalla.." Raccontamela ancora mamma la mia favola.. Prendimi per mano, accompagnami ancora a scuola.. Ma adesso sei diventata vecchia troppo in fretta, sotto a i miei occhi che non se ne erano accorti. (da "Al tèimp e 'l pinsèr" ediz. Tep-Gallarati 1975).